Novruz Məmmədovun Əhməd Davudoğluna hədiyyə etdiyi kitab

Sentyabırn 19-da Prezident Administrasiyasının rəhbərinin müavini və Prezident Administrasiyasının Xarici əlaqələr şöbəsinin müdiri Novruz Məmmədov “Cənubi Qafqazın Yüksələn Ulduzu: İlham Əliyev Dövründə Azərbaycan” kitabının geniştərkibli təqdimat mərasimində iştirak etmək məqsədilə Ankarada işgüzar səfərdə olub.

Lent.az-ın verdiyi məlumata görə, səfər çərçivəsində Novruz Məmmədov Türkiyə xarici işlər naziri Əhməd Davudoğlu, Türkiyə Prezidenti Administrasiyasının rəhbəri Mustafa İsen, Türkiyə Böyük Millət Məclisinin sədr müavini Sadık Yakut və hakim Ədalət və İnkişaf Partiyasının xarici əlaqələr üzrə sədr müavini Mövlud Çavuşoğlu ilə çox faydalı görüşlər keçirib.

Xoş və səmimi şəraitdə keçirilən görüşlər zamanı, iki ölkə arasında olan qardaşlıq və dostluq münasibətləri, iki qardaş ölkə arasında olan bu münasibətlərin daha da inkişaf etdirilməsi yolları, həyata keçirilmiş strateji mahiyyətə malik layihələrin əhəmiyyəti, bir millətin iki dövlətinin gələcəkdə zəruri olan müştərək fəaliyyətləri və atılması vacib olan addımlar üzərində müzakirələr aparılıb. Novruz Məmmədov həyata keçirdiyi görüşlər zamanı Türkiyədən olan rəsmi şəxslərə “Cənubi Qafqazın Yüksələn Ulduzu: İlham Əliyev Dövründə Azərbaycan” kitabını hədiyyə edib.

Novruz Məmmədov Türkiyənin nüfuzlu Hürriyet Daily News qəzeti və Anadolu Agentliyinə müsahibələr verib, ən baxımlı xəbər kanalı “TRT Haber” televiziya kanalında canlı yayımlanan proqramda iştirak edərək ölkəmizin xarici siyasəti, sosial-iqtisadi inkişafı və Azərbaycanın son illərdə olan sürətli inkişafı ilə bağlı çox saylı suallara aydınlıq gətirib.