NATO-nun 64 illiyinə həsr olunmuş tədbir

Bakıda Şimali Atlantika alyansının yaradılmasının 64-cü ildönümünə həsr olunmuş tədbir keçirilib. APA-nın məlumatına görə, tədbir Azərbaycan-NATO əməkdaşlığı institutu tərəfindən təşkil olunub.

Tədbiri açmış Azərbaycan-NATO əməkdaşlığı institutunun direktoru Fərrux Məmmədov NATO-nun yaradılma tarixindən danışıb. O həmçinin qeyd edib ki, NATO və Azərbaycanın əməkdaşlığının başlanmasından 20 il keçməsinə baxmayaraq, bu gün Azərbaycan NATO-ya inteqrasiyaya hazır deyil: "Çünki NATO ilə 20 illik əməkdaşlığa baxmayaraq Azərbaycan ictimaiyyəti Alyans barədə çox məlumatlı deyil», deyə F. Məmmədov bildirib.

O qeyd edib ki, Azərbaycan-NATO əməkdaşlığı institutunun yaradılmasında məqsəd ölkə ictimaiyyətinin Alyansın fəaliyyəti və standartları barədə məlumatlandırılmasıdır. Onun sözlərinə görə, hələlik Azərbaycan bu təşkilatın standartlarına tam olaraq uyğun gəlmir.

Daha sonra F. Məmmədov Azərbaycanda akkreditə olunmuş bəzi NATO ölkələrinin səfirlərinə, ictimai və siyasi xadimlərə, həmçinin bəzi media orqanlarına İnstitutla əməkdaşlığa və Alyansın fəaliyyətini işıqlandırdıqlarına görə təşəkkür edib və onlara fəxri diplomları təqdim edib.

Azərbaycan-NATO əməkdaşlığı institutunun fəaliyyətinə dəstək verdiyinə görə fəxri diplom həmçinin APA informasiya agentliyinə də təqdim olunub.

Diplomlar həmçinin Niderlandın Azərbaycandakı səfiri Aryen Uyterlindeyə və Rumıniyanın səfiri Kristian Çobanuya təqdim olunub. K.Çobanu NATO-Azərbaycan münasibətlərinin fəal surətdə inkişaf etdiyini bəyan edib. Nümunə olaraq o bir sıra birgə uğurlu layihələri, o cümlədən Azərbaycanda həyata keçirilən minaların təmizlənməsi layihələrini göstərib.

F. Məmmədov bildirib ki, İnstitut NATO-nun yaradılmasının 64-cü ildönümünə həsr olunmuş tədbirlərini davam etdirəcək. Belə ki, payızda Bakıda Alyansın baş katibinin iştirakı ilə böyük «NATO və Cənubi Qafqaz» konfransının keçirilməsi planlaşdırılıb.