İlham Əliyev Bolqarıstanın sabiq prezidentini qəbul edib

Azərbaycan prezidenti İlham Əliyev III Bakı Beynəlxalq Humanitar Forumunda iştirak etmək üçün Azərbaycana gələn Bolqarıstanın keçmiş prezidenti Georgi Pırvanovu qəbul edib. Lent.az-ın məlumatına görə, III Bakı Beynəlxalq Humanitar Forumunun ənənəvi olaraq hər il keçirildiyini vurğulayan prezident İlham Əliyev tədbirə beynəlxalq marağın ildən-ilə artdığını deyib. Azərbaycan Prezidenti III Bakı Beynəlxalq Humanitar Forumunda əməkdaşlığın genişləndirilməsi ilə bağlı səmərəli müzakirələrin aparılacağına ümidvar olduğunu bildirib.

İlham Əliyevi prezident seçkilərində əldə etdiyi qələbə münasibətilə təbrik edən G. Pırvanov bu qələbəni Azərbaycan xalqının prezident İlham Əliyevin həyata keçirdiyi siyasətə verdiyi dəstəyin göstəricisi kimi dəyərləndirib. O, bundan sonra da Azərbaycanla Bolqarıstan arasında ikitərəfli münasibətlərin fəal və səmərəli şəkildə davam etdiriləcəyinə əminliyini vurğulayıb. G. Pırvanov III Bakı Beynəlxalq Humanitar Forumunda yenidən iştirakından məmnunluğunu bildirib.

Prezident G. Pırvanovun ölkələr arasında münasibətlərin inkişafına verdiyi töhfəni xüsusi qeyd edib. Dövlət başçısı ölkələr arasında dostluq və tərəfdaşlıq əlaqələrinin daha da genişləndirilməsi üçün böyük imkanların olduğunu deyib.