Ermənistanın Naxçıvana vurduğu ziyan hesablanır

Milli Məclisinin deputatı, iqtisad elmləri doktoru Xanhüseyn Kazımlının rəhbərliyi ilə Azərbaycanın işğal olunmuş ərazilərinə vurulan itki və tələfatların qiymətləndirilməsi üzrə könüllülərdən ibarət İşçi Qrupu Ermənistan tərəfindən Naxçıvana vurulmuş ziyanın hesablanmasına başlayıb.

İşçi Qrupunun üzvü Faiq İsmayılovun Lent.az-a verdiyi məlumata görə, keçən əsrin 90-cı illərindən başlanan erməni separatizminin və təcavüzünün genişlənməsi nəticəsində Naxçıvan Muxtar Respublikasının Azərbaycanın digər əraziləri arasında birbaşa yerüstü quru əlaqələri kəsilib.

Dəmir yolu xəttində ermənilər tərəfindən törədilən müxtəlif təxribatlar və dinc insanlara qarşı terror aktları, bu nəqliyyatın fəaliyyətinin tamamilə dayanmasına səbəb olub. Bu isə Naxçıvanın blokadası ilə nəticələnib. Ermənistan tərəfindən məqsədli şəkildə yaradılan bu blokada Azərbaycanın tərkib hissəsi olan Naxçıvana hər il yüz milyonlarla manat iqtisadi ziyan vurur. Əgər indiyə kim dəmir yolu fəaliyyət göstərsəydi, yük daşımaları sovet dövrünə nisbətən hazırda 2-3 dəfə arta bilərdi. Bu isə Naxçıvanın daha da inkişaf etməsinə və çiçəklənməsinə səbəb olardı. Faiq İsmayılov bildirib ki, 20 ildən ardıq müddət ərzində dəmir yolunun kəsilməsi və şose yolunun bağlanması nəticəsində Naxçıvan Muxtar Respublikasının iqtisadiyyatına və mədəni həyatına dəyən bütün zərərlər, eləcədə bu illər ərzində Muxtar Respublikanın müdafiəsi üçün Azərbaycan Respublikasının büdcəsindən ayrılan pullar da kompensasiya şəkilində Ermənistan tərəfindən Azərbaycana ödənilməlidir.

İşçi Qrupu tərəfindən Ermənistanın Naxçıvan Muxtar Respublikasına vurduğu ziyanla bağlı araşdırmanın nəticələri barədə mətbuata əlavə məlumat veriləcək.