Ərdoğanın İlham Əliyevə təbriki: “Məmnunam”

“Türkiyə və Azərbaycan arasındakı münasibətlərin istər ikitərəfli, istərsə də çoxtərəfli platformalarda inkişafında aparıcı rolunuzun davam edəcəyinə və bu əsasda atacağımız müştərək addımlarla ikitərəfli əlaqələrimizin qardaş xalqlarımızın xeyrinə olacaq şəkildə daha da yüksək səviyyələrə çatdırılacağına tam əminəm”. Lent.az-ın məlumatına görə, bu fikirlər Rəcəb Tayyib Ərdoğanın prezident İlham Əliyevə təbrik məktubunda öz əksini tapıb.

Ərdoğan Azərbaycan xalqının iradəsini əks etdirən seçkilərin əmin-amanlıq və etimad şəraitində keçirilməsindən məmnunluq duyduğunu da bildirib: “2013-cü il oktyabrın 9-da Azərbaycanda keçirilən prezident seçkilərində bu ali vəzifəyə yenidən seçilməyiniz münasibətilə millətim, hökumətim və şəxsən öz adımdan ən səmimi təbriklərimi bildirirəm”.

Türkiyə baş nazirinin təbrik məktubunda həmçinin o da vurğulanır ki, bu gün Azərbaycanın böyük uğurlar qazanaraq bölgədə bir sabitlik abidəsi kimi yüksəlməsində İlham Əliyevin bütün dünyanın təqdir etdiyi müstəsna öndərliyinin payı böyükdür.

Qeyd edək ki, Türkiyə prezidenti Abdullah Gül də dövlət başçısı İlham Əliyevi təbrik edib.