Elmar Məmmədyarov Xəzər Forumunda danışdı

Xarici işlər naziri Elmar Məmmədyarov BMT Baş Assambleyasının 68-ci sessiyasında iştirak etmək üçün Nyu-Yorka səfəri çərçivəsində Xəzər Forumnun işinə qatılıb

Xarici İşlər Nazirliyinin mətbuat xidmətindən Lent.az-a verilən məlumata görə, Forumda Azərbaycan, Türkiyə, Gürcüstan, Xorvatiya, Bosniya və Herseqovina, Makedoniya və Albaniya xarici işlər nazirləri, ABŞ-ın Beynəlxalq Enerji Məsələləri üzrə Səfiri və Avropa İttifaqının Mərkəzi Asiya üzrə xüsusi nümayəndəsi iştirak ediblər.

Elmar Məmmədyarov çıxışında Azərbaycanın enerji strategiyası barədə ətraflı məlumat verib, regional enerji layihələrinin əhəmiyyətini vurğulayıb. Onun sözlərinə görə, Heydər Əliyevin uzaqgörən və siyasi iradəsi ilə Xəzər dənizində beynəlxalq əməkdaşlığın təməli qoyulub. “Əsrin Müqaviləsi”nin imzalanması ilə reallaşmağa başlayan enerji dəhlizi bu gün prezident İlham Əliyev tərəfindən atılan addımlarla daha da genişlənib və şaxələnib. Azərbaycanın Avropanın enerji təhlükəsizliyinə verdiyi töhfələrdən danışan Elmar Məmmədyarov TANAP və TAP layihələri, eləcə də bu layihələrin iştirakçısı olan ölkələr üçün strateji əhəmiyyətini qeyd edib. Xarici işlər naziri bu layihələrin region dövlətlərinin iqtisadi tərəqqisi və sabitliyinin təmin olunmasında oynadığı roldan söz açıb.

Ermənistan-Azərbaycan münaqişəsinin regional inkişafa mane törətdiyini söyləyən Elmar Məmmədyarov bildirib ki, bu münaqişənin tezliklə həlli vacibdir. O, Bunun üçün ilk növbədə Ermənistan qoşunlarının ölkəmizin işğal olunmuş ərazilərindən çıxarılmasının, etnik təmizləmə siyasəti nəticəsində doğma yurd-yuvalarından qaçqın və didərgin düşmüş insanların geri qayıtmasının zəruri olduğunu xüsusi vurğulayıb. Elmar Məmmədyarov nəzərə çatdırıb ki, BMT Təhlükəsizlik Şurasının qəbul etdiyi dörd məlum qətnamənin tələblərini yerinə yetirməyən Ermənistan, öz işğalçı siyasəti nəticəsində regionun bütün strateji layihələrindən kənarda qalıb.