Elmar Məmmədyarov BƏƏ-nin xarici işlər naziri ilə görüşüb

Bu gün xarici işlər naziri Elmar Məmmədyarov Birləşmiş Ərəb Əmirliklərinə (BƏƏ) rəsmi səfəri çərçivəsində bu ölkənin xarici işlər naziri Şeyx Abdullah bin Zayed Əl-Nəhyan ilə görüşüb. Xarici İşlər Nazirliyinin mətbuat xidmətindən Lent.az-a verilən məlumata görə, görüşdə ikitərəfli münasibətlərin mövcud səviyyəsindən məmnunluq bildirilib və iqtisadi əlaqələrin genişləndirilməsi və birgə investisiya layihələrinin həyata keçirilməsi imkanları müzakirə edilib.

Nazirlər beynəlxalq təşkilatlar, o cümlədən BMT və İslam Əməkdaşlıq Təşkilatı çərçivəsində əməkdaşlığın genişləndirilməsini də əhəmiyyətli sayıblar. Elmar Məmmədyarov görüşdə Ermənistan-Azərbaycan münaqişəsinin həlli istiqamətində aparılan danışıqlar prosesi haqqında öz həmkarına məlumat verib. Nazirlər arasında regional məsələlər ətrafında fikir mübadiləsi aparılıb.

Elmar Məmmədyarov BƏƏ-nin xarici işlər nazirini ölkəmizə rəsmi səfərə dəvət edib və dəvət məmnunluqla qəbul olunub.