Danimarka-Azərbaycan “Vətən” Cəmiyyəti bəyanat verdi

Danimarka-Azərbaycan “Vətən” Cəmiyyəti bu ölkənin parlamentinin nümayəndə heyətinin AZərbaycanın işğalda olan Dağlıq Qarabağ ərazisinə səfər etməsinə etiraz olaraq Danimarka Parlamentinə müraciət ünvanlayıb. Cəmiyyətin sədri Səfər Sadiqinin Lent.az-a verdiyi məlumata görə, etiraz məktubu Danimarka Parlamentinin spikeri Mogens Lykketofta , Xarici Siyasət Komitəsinin sədri Mette Gjerskova və millət vəkillərinə göndərilib.

Məktubda deyilir: “Danimarkada yaşayan azərbaycanlılar bu günlərdə danimarkalı parlamentari və jurnalistlərdən ibarət nümayəndə heyətinin Azərbaycanın işğal altında olan torpaqlarına səfər etməsinə öz etirazımızı bildiririk. Azərbaycanın qədim torpağı olan Dağlıq Qarabağ Ermənistan tərəfindən işğal edilib və qanunsuz olaraq bütün dünyada müstəqil respublika kimi tanıdılır. Hesab edirik ki, Danimarka parlamenti üzvlərinin, jurnalistlərin bölgəyə səfər edərək qondarma qurumun “rəhbərləri” ilə görüşlər keçirməsi də qanunsuzdur və Azərbaycan dövlətinin maraqlarına ziddir. BMT, BMT Təhlükəsizlik Şurasının, Avropa Şurasının və digər beynəlxalq təşkilatların münaqişə ilə bağlı və Azərbaycan Respublikasının ərazi bütövlüyünü tanıyan qətnamələri mövcuddur. Danimarkalı parlamentariləri bu təşkilatların, eləcə də Azərbaycan dövlətinin maraqlarına hörmətlə yanaşmağa çağırır və bildiririk ki, Ermənistan tərəfindən işğal edilmiş Dağlıq Qarabağ və ətraf rayonlar Azərbaycanın beynəlxalq hüquqla təsbit edilmiş və ayrılmaz tərkib hissəsidir. Bu səbəbdən də Azərbaycanın işğal edilmiş ərazilərinə belə səfərlər beynəlxalq hüquq normaları ilə ziddiyyət təşkil etməklə, yanaşı bir tərəfdən Ermənistanın işğalçılıq siyasətini təqdir edir, digər tərəfdən isə Azərbaycanın dövlət suverenliyinə hörmətsizlik nümayiş etdirir və onu beynəlxalq hüququn prinsiplərinə zidd olaraq şübhə altına alır”.

Məktubda həmçinin qeyd edilib ki, 1988-ci ildə Ermənistan Respublikasının ərazi iddiası ilə başladığı müharibə Azərbaycan torpaqlarının 20 faizinin (Dağlıq Qarabağ və ətraf rayonlarım) işğalı ilə nəticələnib. Erməni quldurlarının işğal etdikləri rayonlarda, eləcə də 1992-ci ilin fevral ayında Xocalıda törətdiyi qətliamlar nəticəsində yüzlərlə yerli günahsız sakin qəddarlıqla qətlə yetirib və itkin düşüb: “Hazırda danimarkalı parlamentarilərin belə bir quldur rejimin rəhbərliyi ilə görüşlərə qatılmasını münaqişə qurbanlarının, qətlə yetirilmiş minlərlə dinc sakininin ruhuna, Azərbaycanın maraqlarına hörmətsizlik kimi qiymətləndiririk və hesab edirik ki, bu addım xalqlar arasında qarşılıqlı anlaşmaya xidmət etmir və Azərbaycan Respublikası ilə Danimarka arasında siyasi münasibətlərə mənfi təsir göstərə bilər”.