Cəmil Həsənlinin Fantossiyə bənzədilməsinə Milli Şuradan MÜNASİBƏT

Milli Şuranın vahid namizədi Cəmil Həsənli ilə bağlı müxtəlif fikirlər səslənməkdədir. Həsənlinin lider keyfiyyətlərinə malik olmadığı, Müsavat Partiyasının sədri İsa Qəmbər və AXCP sədri Əli Kərimlinin təsir dairəsində olduğu barədə də rəylərin olduğu məlumdur. “1news.az” saytının baş redaktoru Rəhman Hacıyevin də bu gün işıq üzü görmüş “Hamı Fantossiyə qarşı: həftə içi Azərbaycan müxalifəti” başlıqlı yazısında Cəmil Həsənlini məşhur italyan komediyasındakı Fantossi obrazına bənzədib. Bəs Milli Şurada təmsil olunan partiyalar vahid namizədlərinin komik personaja bənzədilməsi ilə razılaşırlarmı?

AXCP sədrinin müavini Fuad Qəhrəmanlı Lent.az-a açıqlamasında deyib ki, belə qeyri-ciddi məsələlərə münasibət bildirmir.

Liberal Partiyasının sədri Əvəz Temirxan isə hesab edir ki, Cəmil Həsənli yarınmış vəziyyətdə uğurlu namizəddir: “Biz Milli Şura daxilində və kənarında İsa Qəmbər tərəfdarlarının apardığı mübarizə və savaşa baxmayaraq, Cəmil Həsənlini müdafiə edirik. Milli Şurada Müsavat Partiyasının yaratdığı qalmaqalda ən çox zərər çəkən də Cəmil müəllimdir. Cəmil Həsənli diplomatiya və tarixin bilicisidir”.

Klassik Xalq Cəbhəsi Partiyasının (KXCP) sədri Mirmahmud Mirəlioğul isə bildirir ki, siyasilər içərisində Cəmil Həsənlini daha çox tanıyan beş nəfərdən biridir. O, Cəmil Həsənlini 1978-79-cu ildən Əbülfəz Elçibəyin təqdimatı ilə tanıyır: “Mən Cəmil Həsənlinin kimlərinsə təsirində olması fikri ilə razı deyiləm Cəmil müəllimin kiminsə təsirinə düşməsinin şahidi olmamışam və ona görə də belə yanaşmaları doğru saymıram. Partiyamız Cəmil Həsənlinin təbliğat kampaniyasına da öz töhfəsini verəcək”.

Müsavat Partiyasının Divan üzvü Gülağa Aslanlı isə başı Cəmil Həsənlinin imzatoplama kampaniyasına qarışdığı üçün bütün suallara yalnız sentyabrın 9-dan sonra cavablandıra biləcəyini söylədi.