ABŞ-ın daha bir sabiq prezidentinin övladı Bakıya gəlir

ABŞ-ın 36-cı Prezidenti Lindon Consonun qızı Lusi Conson mayın 6-8-də Azərbaycana səfər edəcək.

Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, səfərin məqsədi Cənubi Qafqaz Forumu çərçivəsində Dünya Azərbaycanlı Gənclər Birliyinin “Gələcəyin liderləri” mövzusunda keçirəcəyi panel iclasında iştirak etməkdir.

Panel iclasda Lusi Consondan başqa ABŞ sabiq prezidentləri Corc Buşun nəvəsi Corc P. Buş, Robert F. Kennedinin oğlu Con Kennedi II, Ronald Reyqanın oğlu Mayk Reyqan, BMT Baş Katibinin xüsusi müşaviri, xanım Nafis Sadik, Böyük Britaniya Kral Akademiyasının ilk və yeganə qadın rəhbəri Baronessa Suzan Qrinfild kimi nüfuzlu qonaqlar iştirak edəcək.

Panel iclasın moderatorluğunu Dünya Bankının sabiq 1-ci vitse-prezidenti İsmayıl Seragəldin edəcək.

Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzi və Madrid Klubunun birgə reallaşdırdığı Cənubi Qafqaz Forumu dünyanın 60-dan çox ölkəsindən 400-ə yaxın beynəlxalq mütəxəssisi, 50-dən çox sabiq ölkə və hökumət başçısını bir araya toplayacaq.

Qeyd edək ki, Cənubi Qafqaz Forumu çərçivəsində Dünya Azərbaycanlı Gənclər Birliyinin "Gələcəyin liderləri" mövzusunda keçirəcəyi panel iclasında iştirak etmək üçün ABŞ-ın sabiq prezidentləri Ronald Reyqanın oğlu Maykl Reyqan, Corc Buşun nəvəsi Corc P.Buş, Robert F.Kennedinin oğlu Con Kennedi II Azərbaycana gələcəklər.