Ərdoğan: “Qarabağ münaqişəsi həll olunmadan sərhədlər açılmayacaq”

Türkiyənin baş naziri Rəcəb Tayyib Ərdoğan dünən İstanbulda ölkənin televiziya və qəzet rəhbərləri üçün iftar süfrəsi açıb.

Lent.az Türkiyə mətbuatına istinadən xəbər verir ki, media mənsublarının suallarını cavablandıran baş nazir bəzi açıqlamalar da verib. Ərdoğan Türkiyə-Ermənistan sərhədlərinin açılması ilə bağlı prosesə münasibət bildirərkən “Azərbaycanla Ermənistan arasındakı münaqişə həll olunmadan sərhəd qapılarını aça bilmərik, bunu özlərinə də söyləmişik”, deyib.

“Azərbaycan prezidenti İlham Əliyev, Rusiya prezidenti Dmitri Medvedev və Ermənistan prezidenti Serj Sarkisyan arasında görüşlər intensivləşib. Dağlıq Qarabağ məsələsinin həlinə yaxın nöqtədəyik. Bu problem həllini tapmadan, addım atmağımız mümkün deyil. Bir də erməni diasporunun tutduğu mövqedən əl çəkməlidir. Diasporun Ermənistana bir faydası yoxdur. Diaspor Ermənistanın adından faydalanır, yalnız bu işi görür”.