Milli Məclis toplanır

Növbədənkənar iclasın gündəliyinə 6 məsələ daxildir

Bu gün Milli Məclisin növbədənkənar sessiyasının ilk iclası keçiriləcək. İclasda “Bank olmayan təşkilatların fəaliyyəti haqqında” qanun layihəsindən tutmuş mühasibat uçotu sahəsində bəzi qərarların qüvvədən düşməsinədək bir çox məsələlər müzakirə olunacaq.

Milli Məclisin mətbuat xidmətinin rəhbəri Akif Təvəkküloğlu Lent.az-a bildirib ki, bugünkü iclasın gündəliyinə 6 məsələ daxil edilib. Bunlardan biri “Könüllülük fəaliyyət haqqında” qanun layihəsi üçüncü oxunuşda müzakirə ediləcək. Gündəlikdə duran digər məsələlər “Naxçıvan Muxtar Respublikasının, Naxçıvan şəhərinin və Babək rayonunun inzibati ərazi bölgüsündə qismən dəyişikliklər edilməsi”, “Bələdiyyələrin statusu haqqında” qanuna əlavə və dəyişikliklər edilməsi ilə bağlıdır. Millət vəkilləri bu gün həmçinin dövlət ehtiyatı üçün nəzərdə tutulmuş torpaqlardan istifadə qaydalarını da müzakirə edəcəklər.

Akif Təvəkküloğlu deyib ki, növbədənkənar iclasların birində “Təhsil haqqında” qanun layihəsinin də müzakirəyə çıxarılacağı planlaşdırılıb. Ancaq bunun konkret vaxtı hələ müəyyənləşməyib.

Elxan SALAHOV