Ukrayna prezidentinin qardaşı azərbaycanlıların tədbirinə gəldi

Ukraynanın paytaxtı Kiyev şəhərində Dünya Azərbaycanlıları Konqresinin (DAK) Ukrayna nümayəndəliyinin təsis konfransı keçirilib. Qurumun mətbuat xidmətindən Lent.az-a verilən məlumata görə, yığıncaqda DAK həmsədri Sabir Rüstəmxanlı, DAK Daimi Şurasının sədri Əjdər Tağızadə və DAK İdarə Heyətinin üzvləri - Rəhman Abbasov, Tahir Hacıyev, Ukrayna Azərbaycanlıları Konqresinin (UAK) sədri Akif Gülməmmədov, Ukrayna prezidenti Viktor Yuşenkonun qardaşı, Ali Radanın üzvü Petro Andreyeviç Yuşenko, Ukraynanın tanınmış şairi İvan Dreç, Azərbaycanın Ukraynadakı səfirliyinin əməkdaşları, Azərbaycan-Ukrayna Qadınlar Birliyinin rəhbərliyi, Ukrayna-Türkiyə İş adamları Birliyinin nümayəndələri, GUAM Jurnalistlər Birliyinin təmsilçiləri, Ukraynada yaşayan və fəaliyyət göstərən azərbaycanlı ziyalılar, Ukraynanın müxtəlif dövlət orqanlarında çalışan soydaşlarımız, Vilayət Məclislərinin üzvləri olan azərbaycanlılar, yerli KİV nümayəndələri qatılıblar. Konfransı Ukraynada yaşayan və fəaliyyət göstərən soydaşımız Fərhad Turanlı aparıb. Yığıncaqda DAK həmsədri Sabir Rüstəmxanlı, DAK Daimi Şurasının sədri Əjdər Tağızadə, DAK İdarə Heyətinin üzvü Rəhman Abbasov, UAK sədri Akif Gülməmmədov, Ukrayna prezidenti Viktor Yuşenkonun qardaşı, Ali Radanın üzvü Petro Andreyeviç Yuşenko, Ukraynanın tanınmış şairi İvan Dreç çıxış ediblər. Konfransın yekununda Ukraynada yaşayan və fəaliyyət göstərən soydaşımız Möhlət Hüseynov DAK-ın Ukrayna nümayəndəliyinin sədri seçilib.
Pərvin ABBASOV