Əsir götürülən çavuşun azad olunması üçün BQXK-ya müraciət edildi

Rəsmi qurumlar Anar Hacıyevin əsir götürüldüyünü təsdiqlədi

Əsir və itkin düşmüş, girov götürülmüş vətəndaşlarla əlaqədar Dövlət Komissiyası mayın 10-da Ermənistan Silahlı Qüvvələri tərəfindən əsir götürülmüş Azərbaycan ordusunun çavuşu Anar Xanbaba oğlu Hacıyevin azad olunmasına köməklik göstərməsi üçün Beynəlxalq Qırmızı Xaç Komitəsinin (BQXK) Azərbaycan nümayəndəliyinə müraciət edib.

Bu barədə APA-ya komissiyanın katibi Şahin Sailov bildirib. Onun sözlərinə görə, komissiya A. Hacıyevin əsir götürülməsi faktını təsdiqləyib və onun azad olunması üçün lazım olan bütün addımları atacaq: “Bu gün Beynəlxalq Qırmızı Xaç Komitəsinə yazılı müraciət olunub. Müraciətə cavab gözləyirik”.

Azərbaycan Müdafiə Nazirliyinin mətbuat xidmətindən də APA-ya çavuş Anar Hacıyevin Ermənistan Silahlı Qüvvələri tərəfindən əsir götürülməsi faktını təsdiqləyiblər. Çavuşun hansı şəraitdə əsir götürüldüyü isə hələlik məlum deyil. Nazirlik bununla bağlı araşdırmalar aparır.

Qeyd edək ki, 1990-cı il təvəllüdlü Anar Xanbaba oğlu Hacıyev Goranboy Rayon Hərbi Komissarlığından hərbi xidmətə çağırılıb. Onun mayın 10-da saat 9.45-də Ermənistan Silahlı Qüvvələri tərəfindən əsir götürüldüyü bildirilir.