XİN seçkiləri işıqlandırmaq istəyən xarici jurnalistlərin akkreditasiya qaydalarını açıqladı

Lent.az-ın XİN-in rəsmi saytına istinadən verdiyi məlumata görə, xarici kütləvi informasiya vasitələrini təmsil edən mətbuat nümayəndələri “Kütləvi informasiyalar haqqında Azərbaycan Respublikasının Qanununa” əsasən Xarici İşlər Nazirliyində akkreditasiyadan keçməlidirlər.

Akkreditasiya qaydaları aşağıdakılardır:

Xarici kütləvi informasiya vasitələrini təmsil edən mətbuat nümayəndələri
akkreditasiyadan keçmək məqsədi ilə Azərbaycan Respublikasının xaricdə
yerləşən səfirlik və baş konsulluqlarına müraciət edərək akkreditasiya üçün
aşağıdakı sənədləri təqdim etməlidirlər.

- Jurnalistin müfəssəl formada tərtib olunmuş və imzalanmış tərcümeyi-
halı;

- 1 ədəd 4x3 ölçüsündə fotoşəkil;

- Akkreditasiya olunmaqla əlaqədar KİV rəhbərliyinin Xarici İşlər
Nazirliyinə ünvanlanmış müraciət məktubu (məktubda akkreditasiya
müddəti və məqsədi göstərilməlidir). Məktubda həmçinin ölkəyə
gətiriləcək texnikanın siyahısı və mətbuat nümayəndələrinin ölkəyə giriş-
çıxış tarixi və marşrutu göstərilməlidir;

- Səfər edəcək jurnalistin pasportunun və təmsil etdiyi KİV-i tərəfindən
verilmiş jurnalist vəsiqəsinin sürəti ;

Azərbaycan Respublikasının diplomatik nümayəndəliyi olmadığı ölkələrin
jurnalistləri göstərilən sənədləri Xarici İşlər Nazirliyinin mətbuat xidmətinə
birbaşa təqdim etməlidirlər. Akkreditasiya üçün tələb olunan sənədlər xarici
jurnalistlər tərəfindən 2010-cu ilin 29 oktyabr tarixinədək qəbul olunacaq.
Jurnalistlər XİN-in akkreditasiya kartını ölkəyə gəldikdən sonra XİN-in mətbuat xidmətindən şəxsən götürməlidirlər.