Bu gün Müstəqillik Günüdür

Azərbaycan xalqının əzmkar mübarizəsi və SSRİ-nin süquta uğraması ilə yaranan əlverişli tarixi şərait nəticəsində Azərbaycan xalqı XX yüzillikdə ikinci dəfə müstəqillik bayrağını qaldırıb.

Azərbaycan Respublikası Ali Sovetinin xalqın tələbi ilə çağırılmış növbədənkənar sessiyasında 1991-ci il avqustun 30-da Azərbaycan Respublikasının dövlət müstəqilliyini bərpa etmək haqqında Bəyannamə qəbul edilib. Ali Sovetin 1991-ci il 18 oktyabr tarixli sessiyasında isə “Azərbaycan Respublikasının Dövlət Müstəqilliyi Haqqında” Konstitusiya Aktı yekdilliklə qəbul edilib. Bu, xalqımızın siyasi tarixində XX əsrdəki ikinci parlaq qələbəsidir.

Dekabrın 29-da Azərbaycanda ümumxalq səsverməsi keçirilib və Azərbaycan xalqı yekdilliklə dövlət müstəqilliyinə tərəfdar çıxıb.

1992-ci ilin mayında Milli Məclis tərəfindən Azərbaycan Respublikasının Dövlət himni (musiqisi Üzeyir Hacıbəyovun, sözləri Əhməd Cavadın), az sonra üçrəngli bayraq, içində alov olan səkkiz guşəli ulduz təsvirli dövlət gerbi təsdiq edilib.

1991-ci il oktyabrın 18-dən Azərbaycan istiqlal, suveren bir ölkədir və xalq bunu bir bayram kimi qeyd olunur.