YAP sıralarından çıxarılanların adları açıqlandı

Partiyanın icra katibinin müavini Siyavuş Novruzov APA-ya açıqlamasında bildirib ki, bunlar namizədliklərini 16 saylı Yasamal II, 89 saylı Göyçay-Ağdaş və 109 saylı Balakən seçki dairələrindən irəli sürmüş şəxslərdir.

16 saylı Yasamal II Seçki Dairəsindən namizədliyi özü tərəfindən irəli sürülmüş Babayev Fəxrəddin Səmsəddin oğlu “Haqlı tələb” qəzetinin baş redaktorudur, o, YAP-ın Nərimanov rayon təşkilatının üzvü olub.

YAP-dan xaric edilmiş digər şəxslər 89 saylı Göyçay-Ağdaş seçki dairəsindən namizədliyi özü tərəfindən irəli sürülmüş Rəhimova Rəqibə Cəfər qızı və 109 saylı Balakən Seçki Dairəsindən namizədliyi özü tərəfindən irəli sürülmüş Nooyev Məhəmməd Əsədullah oğludur. Sonuncu İqtisadi İnkişaf Nazirliyinin Abşeron rayon Şöbəsində böyük məsləhətçi vəzifəsində çalışır.

“Partiyada namizədlikləri özləri tərəfindən irəli sürülmüş şəxslərlə bağlı da işlər gedir. Ancaq partiyadan çıxarılmış həmin üç nəfər YAP-ın namizədləri rəsmi qaydada irəli sürüldükdən sonra özləri fərdi qaydada namizədliklərini irəli sürüblər. Artıq həmin şəxslərin YAP sıralarından çıxarılması ilə bağlı protokollar müvafiq dairə seçki komissiyalarına göndərilib ki, onların adlarının qarşısından YAP sözü çıxarılsın” – deyə, S. Novruzov əlavə edib.

Qeyd edək ki, YAP 7 noyabr parlament seçkiləri ilə əlaqədar 114 seçki dairəsi üzrə vahid namizəd irəli sürüb. Sonradan bu say 111-ə enib.