YAP 3 üzvünü cəzalandırdı

Yeni Azərbaycan Partiyası (YAP) fərdi qaydada namizəd kimi seçkilərə qatılan 10-a qədər üzvündən 3-ü artıq sıralarından ixrac edib.

Lent.az-ın verdiyi məlumata görə, bunu YAP sədrinin müavini, partiyanın icraçı katibi Əli Əhmədov söyləyib.

O bildirib ki, bu, həmin insanların seçib-seçilmək hüququnun pozulması demək deyil: “Biz YAP üzvü olan və fərdi qaydada seçkiyə qatılan şəxslərə bildirmişik ki, partiyadan çıxın və seçkilərdə müstəqil namizəd kimi iştirak edin. Əgər onlar seçkilərdə uğur qazanıb deputat seçilərlərsə, onları birinci təbrik edən biz olacağıq. Ancaq həmin dairədə YAP-ın namizədi olduğu halda partiya üzvlərindən hər hansının o dairədən namizədliyini irəli sürməsi, mübarizə aparması siyasi etikaya da ziddir”.

Əli Əhmədov partiya sıralarından xaric edilənlərin o qədər də tanınmış şəxslər olmadığını bildirib. O, bu sırada 110 saylı Zaqatala Seçki Dairəsindən namizədliyini fərdi qaydada irəli sürdüyünə görə partiyadan uzaqlaşdırılan Məhəmməd Noyevin adını çəkib.

Ramiz