3 deputatımız İtaliyaya gedir

Milli Məclisi mətbuat xidmətindən Lent.az-a verilən məlumata görə, vitse-spiker, ATƏT Parlament Assambleyasında Azərbaycan nümayəndə heyətinin rəhbəri Bahar Muradovanın başçılığı ilə parlament nümayəndə heyəti qurumun payız sessiyasının işində iştirak edəcək. Nümayəndə heyətinə Milli Məclisin İnsan hüquqları komitəsinin sədri Rəbiyyət Aslanova və millət vəkili Fazil Mustafa daxildirlər.

Sessiyanın əvvəlki iki günü ATƏT PA-nın Aralıq dənizi forumunun keçirilməsinə həsr olunur. Burada Aralıq dənizi hövzəsində iqtisadi və infrastruktur sahələrində əlaqələr, mədəniyyət və ətraf mühit üzrə əməkdaşlıq məsələləri barədə fikir mübadiləsi aparılacaq. Oktyabrın 9-da isə sessiya çərçivəsində “Transmilli mütəşəkkil cinayətkarlığa və korrupsiyaya qarşı mübarizə” mövzusunda konfrans keçiriləcək. Konfransda korrupsiya və insan alveri ilə mübarizə məsələləri müzakirə ediləcək.

Sessiyanın yekununda daimi komitənin iclası keçiriləcək. İclasda ATƏT PA-nın qarşıdakı dövr üçün fəaliyyət proqramına baxılacaq. Azərbaycan nümayəndə heyətinin üzvləri mövzularla bağlı fikirlərini açıqlayacaqlar.

Elxan SALAHOV