Həmsədrlər oktyabrın 4-də Azərbaycana gələcəklər

Bu barədə APA-ya açıqlamasında rusiyalı həmsədr İqor Popov bildirib. Diplomat deyib ki, oktyabrın 4-5-də Azərbaycan rəhbərliyi ilə Dağlıq Qarabağ ətrafındakı işğal olunmuş ərazilərə qiymətləndirmə missiyasının səfəri ilə bağlı görüşlər keçirəcəklər: “Görüşlərin yekununa dair mətbuat konfransı keçirəcəyik”.

Xatırladaq ki, Azərbaycan tərəfinin xahişi ilə ATƏT-in qiymətləndirmə missiyası işğal olunmuş ərazilərə səfər edəcək. Missiya ilə bağlı vasitəçilər birgə bəyanatla çıxış ediblər. Bəyanatda deyilir ki, həmsədrlər BMT-nin Cenevrə və Nyu-Yorkdakı rəsmi şəxsləri ilə əvvəldən apardığı danışıqlar əsasında BMT İnkişaf Proqramının və BMT-nin Qaçqınlarla İş üzrə Ali Komissarlığının ekspertlərini rəsmi şəkildə missiyada iştiraka dəvət ediblər.

Qeyd edək ki, qiymətləndirmə missiyası Dağlıq Qarabağ ərazisində olmayacaq, yalnız ətraf 7 rayonda araşdırma aparacaq. Oktyabrın 4-də başlayacaq səfər oktyabrın 14-dək davam edəcək.

Buna aydınlıq gətirən XİN mətbuat katibi Elxan Poluxov APA-ya bildirib ki, Azərbaycan öz xahişində məhz bu ərazilərdə qeyri-qanuni məskunlaşma faktlarının araşdırılmasını istəyib.