“Azərbaycanın artıq heç kimə ehtiyacı yoxdur”

Azərbaycan, Rumıniya və Gürcüstan arasında Bakıda imzalanan son razılaşma sentyabrın 23-də Vaşinqtonda keçirilən enerji sammitində yüksək qiymətləndirilib. APA-nın Vaşinqton müxbirinin məlumatına görə, analitiklər – Heritage Fondunun nümayəndəsi Ariel Kohen və Mərkəzi Asiya və Qafqaz İnstitutunun nümayəndəsi Svante Kornell bildiriblər ki, müstəqil enerji siyasəti yürütmək üçün Azərbaycanın artıq heç kimə ehtiyacı yoxdur.

“Bu gün bazarlar istehlakçıdan deyil, satıcıdan asılıdır. Öz enerji ehtiyatlarını harada satmağı ölkələr özləri müəyyənləşdirir”. Bu fikirləri Svante Kornell bildirib.

O, həmçinin qeyd edib ki, Xəzər hövzəsi ölkələri, xüsusilə də Azərbaycan regionda enerji diversifikasiyası cəhətdən çox mühüm əhəmiyyət kəsb edir.

“Azərbaycan, Türkmənistan və digər ölkələrin iştirak etdiyi layihələr Rusiyanın deyil, monopoliyanın əleyhinədir. Bu obyektiv siyasətdir”.

Sammitdə iştirak edən senatorlar və digər rəsmilər enerji təhlükəsizliyində BTC layihəsi və Transxəzər layihəsinin rolundan danışıblar.

Tədbirdə, həmçinin Xəzər dənizinin ekoloji təhlükəsizliyi və dənizdə qazma işlərinin aparılması barədə müzakirələr aparılıb. Bir çox ekspertlər bildirdilər ki, Meksika körfəzindəki faciə bir daha təkrarlanmamalıdır, daha təhlükəsiz yol tapana qədər “Kaşağan” kimi yataqlarda qazma işlərinin aparılması təhlükəlidir.

İştirakçılar həmçinin alternativ enerji mənbələrindən istifadənin mümkünlüyünü də müzakirə ediblər.