Erməni diplomat Bakıda

Azərbaycan Dövlət Filarmoniyasında “Üzeyir Hacıbəyov-125” beynəlxalq musiqi festivalı çərçivəsində məşhur dirijor, SSRİ xalq artisti, Moskva Beynəlxalq Musiqi Evinin prezidenti Vladimir Spivakovun rəhbərliyi ilə MDB Ölkələrinin Gənclər Simfonik Orkestrinin konserti keçirilib. APA-nın məlumatına görə, konsert proqramından öncə çıxış edən Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy dahi bəstəkar Üzeyir Hacıbəyovun 125 illiyi ilə bağlı tədbirlərdə iştirak etmək imkanı əldə etdiyi üçün qürur hissi keçirdiyini bildirib. Konsert proqramını izləyənlər arasında Azərbaycanın Rusiyadakı səfiri Polad Bülbüloğlu və Ermənistanın Rusiyadakı keçmiş səfiri, MDB ölkələri Dövlətlərarası Humanitar Əməkdaşlıq Fondunun icraçı direktoru Armen Smbatyanın da olduğunu deyən Mixail Şvıdkoy hər iki səfiri salamlayıb. Daha sonra konsert proqramı solistlər Senin və Olqa Volkovanın çıxışları ilə davam edib. Proqramda Üzeyir Hacıbəyovun “Arazbarı”, Cüzeppe Verdinin “Taleyin gücü” operasından, Pyotr Çaykovskinin “Qu gölü” və “Şelkunçik” baletindən parçalar ifa olunub.