ABŞ-ın Bakıdakı səfirliyində əlavə təhlükəsizlik tədbirləri görülüb

Bakıda yaşayan Amerika vətəndaşlarına təhlükəsizlik xəbərdarlığı edilib

ABŞ-ın Bakıda səfirliyi bu gün Azərbaycan Dövlət Neft Akademiyasında (ADNA) baş verən terror aktı ilə əlaqədar olaraq əlavə qabaqlayıcı təhlükəsizlik tədbirləri görüb. Bu barədə Lent.az-a səfirliyin İctimaiyyətlə əlaqələr şöbəsindən məlumat verilib. Şöbədən bildirilib ki, səfirlik diplomatik korpusun əməkdaşları da daxil olmaqla Bakıdakı bütün ABŞ vətəndaşlarını hadisə baş verən əraziyə getməməyə, həmçinin ehtiyatlı davranmaları barədə xəbərdar edib.

“Bu, adi praktikadır. Adətən hansısa hadisə baş verəndə bu cür tədbirlər görürük” – deyə, səfirlikdən qeyd olunub.

Böyük Britaniyanın Bakıdakı səfirliyində isə hadisə ilə bağlı əlavə təhlükəsizlik tədbirləri görülməyib. Səfirlikdən Lent.az bildirilib ki, yalnız diplomatik korpusun əməkdaşlarına hadisə ilə bağlı ümumi xarakterli məlumat verilib. Səfirlik öz əməkdaşlarına hadisə baş verən və oraya yaxın ərazilərə getməmək tövsiyə xarakterli göstəriş verib.

Pərvin ABBASOV