Bakıda kibertəhlükəsizliyə dair beynəlxalq tədbir keçirilir

Lent.az-ın verdiyi məlumata görə, iki gün davam edəcək tədbirə MTN, DİN rəsmiləri, beynəlxalq təşkilatlar, vətəndaş cəmiyyətlərinin nümayəndələri qatılıb. Praktik seminarın məqsədi kibertəhlükəsizliyə dair ardıcıl siyasət qəbul etmək və kibercinayətkarlıq haqqında Avropa Şurası Konvensiyasını həyata keçirməkdə Azərbaycan hökumətinə kömək etməkdir.

ATƏT-in Bakı ofisinin rəhbəri Bilgi Cankorel bildirib ki, Azərbaycan kibercinayətkarlığa qarşı mübarizədə vahid siyasət və beynəlxalq əməkdaşlığı təşkil edən bu konvensiyanı bu il iyulun 1-də ratifikasiya edib. B.Cankorel ümidvardır ki, bugünkü seminar şəxsi məlumat və özəl həyatın qorunması ilə əlaqədar hüquq və azadlıqların müdafiəsində Azərbaycana köməklik göstərəcək. Bu da öz növbəsində “Kibercinayətkarlıq haqqında” konvensiyasını yerinə yetirməyə imkan yaradacaq.

ATƏT-in Bakı ofisinin rəhbəri qeyd edib ki, konvensiyanın həyata keçirilməsi cinayət qanunvericiliyinin təkmilləşdirilməsi, prosedurların yenidən nəzərdən keçirilməsi, daha effektli hüquq mühafizə tədbirlərinin həyata keçirilməsi və internet xidməti provayderləri ilə daha yaxşı əməkdaşlığın qurulması kimi bəzi təklifləri tələb edə bilər.

Praktik seminarda əsas diqqət beynəlxalq tədbirlər və hüquqi çərçivələr, təhlükələr və meyllər, KİV-in təhlükəsizlik həyatında vətəndaş cəmiyyətinin iştirakı, eləcə də bu işdə hökumət və vətəndaş cəmiyyəti arasında əməkdaşlıq məsələlərinə yönəlib.

Bilgi Cankorel bildirib ki, ATƏT 2004-cü ildə qəbul etdiyi öhdəlik özəl həyat hüquqları, eləcə də fikir və ifadə azadlığının təmin edilməsi şərtilə ölkələrin internetdən terror məqsədi üçün istifadəyə dair məlumat mübadiləsinə və bu təhlükə ilə mübarizəyə dair mümkün strategiyaları qəbul etməyə çağırır: “Bugünkü seminar ATƏT-ə üzv ölkələrin bu öhdəliyi yerinə yetirilməsini dəstəkləmək üçün göstərilən səylərin tərkib hissəsidir”.

Ramiz Mikayıloğlu