Birmandatlı seçki dairələrindən namizədlərin irəli sürülməsinə start verildi

Mərkəzi Seçki Komissiyasının (MSK) mətbuat xidmətindən APA-ya verilən məlumata görə, passiv seçki hüququ olan vətəndaşlar, seçicilərin təşəbbüs qrupları, siyasi partiyalar və siyasi partiyaların blokları birmandatlı seçki dairələri üzrə namizədləri irəli sürə bilərlər.

Bu gün MSK tərəfindən təsdiqlənmiş “Dördüncü çağırış Azərbaycan Respublikasının Milli Məclisinə seçkilərin hazırlanıb keçirilməsi üzrə əsas hərəkət və tədbirlərin Təqvim Planı”na əsasən dairə seçki komissiyaları (DSK) tərəfindən namizədliyin irəli sürülməsinin təsdiq olunub-olunmaması barədə əsaslandırılmış qərarı müvafiq sənədlərin DSK-ya təqdim edilməsindən sonra 5 gün müddətində qəbul edəcək.

DSK-lar tərəfindən namizədə və ya onun səlahiyyətli nümayəndəsinə, habelə siyasi partiyanın və siyasi partiyalar blokunun səlahiyyətli nümayəndələrinə imza vərəqələrinin verilməsi namizədliyin irəli sürülməsini təsdiq edən qərar qəbul edildiyi gündən başlayacaq.

Namizədlərin müdafiəsi üçün seçici imzalarının toplanması müvafiq DSK-nın deputatlığa namizədliyin irəli sürülməsini təsdiq edən qərarından sonra başlanacaq.

Namizədliyin qeydə alınması üçün zəruri seçki sənədlərinin və birinci ilkin maliyyə hesabatının təqdim edilməsi üçün ayrılmış vaxt sentyabrın 18-dən oktyabrın 8-i saat 18.00-dəkdir.

Seçkiqabağı təşviqatın aparılması oktyabrın 15-də başlanır, noyabrın 6-da saat 8.00-da dayandırılır.

“Exit-poll” keçirmək niyyətində olan təşkilatların akkreditasiyadan keçmək üçün təqdim etdikləri sənədlərin MSK tərəfindən qəbul edilməsi oktyabrın 18-də yekunlaşır.

Qeyd edək ki, hələ namizədliyin irəli sürülməsi faktı qeydə alınmayıb.