Tapdıq Abbas Müsavat Partiyasından çıxarılmadı

Müsavat Partiyasının Məclis üzvü, “Paralel” qəzetinin baş redaktoru Tapdıq Abbas partiyadan xaric olunmayıb. Lent.az-ın verdiyi məlumata görə, Məclis üzvlərinin 26-sı Tapdıq Abbasın partiyadan xaric olunmasının lehinə, 27-i əleyhinə səs verib, 6-sı isə bitərəf qalıb.

Partiyadan xaric edilmə üçün Məclis üzvlərinin 50 faiz +1 səsi lazım olduğundan, Tapdıq Abbas bu aqibətdən qurtulub. Ancaq bununla belə, Tapdıq Abbasa töhmət verilib.

Qeyd edək ki, bu gün Məclisin iclası başlayarkən partiya üzvlərindən bir neçəsi Məclis üzvü, "Paralel" qəzetinin baş redaktoru Tapdıq Abbasın Müsavatdan çıxarılması məsələsinin gündəliyə salınmasında israr edib. Onlar Tapdıq Abbasın Milli Mətbuat Günü ərəfəsində Fəxri Xiyabanda Heydər Əliyevin abidəsinin ziyarət olunması mərasimində iştirak etməsini səbəb göstəriblər. İclas qalmaqallı keçib.

Tapdıq Abbas 2005-ci il parlament seçkilərində Müsavat, AXCP və ADP-nin bir araya gəldiyi “Azadlıq” Seçki Blokunun 81 saylı Beyləqan Seçki Dairəsindən vahid namizədi olub. Bu seçkilərdə isə Müsavat-AXCP blokunun eyni dairədən namizədi olması nəzərdə tutulmuşdu. Ancaq bu gün keçirilən Məclisdə onun adı namizədlər siyahısından çıxarılıb.

Ramiz