Naxçıvanlı nazir Türkiyənin dövlət nazirinə hədiyyə göndərdi

Naxçıvan Muxtar Respublikasında (MR) "İnşaat sektorunun ticarət heyəti" mövzusunda tədbir keçirilib. Lent.az-ın Türkiyə mətbuatına istinadən verdiyi məlumata görə, tədbir çərçivəsində türk iş adamları MR-li iş adamları ilə ümumilikdə 15 milyon dollarlıq razılaşma imzalayıb.

Şərqi Anadolu İxracatçılar Birliyi İdarə Heyətinin sədri Camal Şengel bununla bağlı açıqlamasında deyib ki, rəhbərlik etdiyi qurumun təşkilatçılığı, dövlət naziri Zəfər Çağlayananın və Xarici Ticarət Müstəşarlığının dəstəyi ilə baş tutan tədbiri məhsuldar saydığını bildirib.

MR-in İqtisadi İnkişaf Nazirliyində baş tutan görüşdə Türkiyədən getmiş 40 iş adamı naxçıvanlı iş adamlarıyla görüşüb.

Tədbirdə MR-in iqtisadi inkişaf naziri Famil Seyidov, Şərqi Anadolu İxracatçılar Birliyi İdarə Heyətinin sədri Camal Şengel çıxış ediblər.

Mərasimin sonunda nazir Famil Seyidov Türkiyənin dövlət naziri Zəfər Çağlayana çatdırmaq üçün Camal Şengelə tablo təqdim edib.