“Qarabağ” Seçki Blokunun yaradılması barədə saziş imzalanacaq

Gələn həftənin bazar ertəsi “Qarabağ” Seçki Blokunun yaradılması barədə Ümid Partiyası, Demokrat Partiyası və Aydınlar Partiyasının sədrlərinin saziş imzalaması nəzərdə tutulub.

Bunu Lent.az-a açıqlamasında Ümid Partiyasının Ali Məclisinin sədri Ənvər Ağazadə söyləyib. Ənvər Ağazadə onu da deyib ki, bu gün Demokrat Partiyasının qərargahında blokun İşçi Qrupunun toplantısı olub. Toplantıda Namizədlərin plakatlarının ilkin forması barədə razılıq əldə olunub. Ancaq İşçi Qrupu yenə də hər 3 partiyanın təmsilçilərinin iddialı olduqları 7 seçki dairəsi üzrə vahid namizəd məsələsində yenə razılıq əldə edə bilməyib: “İşçi Qrupunda 7 dairə üzrə bu gün də irəliləyiş olmadı. Onu da deyim ki, şənbə günü saat 14:00-da Demokrat Partiyasının qərargahında blokun bütün namizədlərinin iştirakı ilə toplantı keçiriləcək. Şənbə günü bu toplantıdan əvvəl 7 dairə üzrə yaranmış problemi həll etmək üçün həmin dairələrdə namizəd olmaq istəyən şəxslərlə görüş keçiriləcək və bu dairələr üzrə də vahid namizədlərin razılaşdırılmasına çalışılacaq. Ümumilikdə, indiyə qədər 3 partiya 93 seçki dairəsi üzrə vahid namizəd məsələsində razılaşma əldə edib”.