İsmayıl Ömərova Beynəlxalq Aytmatov Akademiyasının akademiki diplomu təqdim olundu - FOTO

İctimai Televiziya və Radio Yayımları Şirkətinin baş direktoru İsmayıl Ömərov türkdilli xalqların ədəbiyyatı və mədəniyyətinin inkişafı sahəsindəki xidmətlərinə görə Beynəlxalq Aytmatov Akademiyasının akademiki seçilib.

İTRYŞ-nin İctimaiyyətlə əlaqələr və monitorinq şöbəsindən Lent.az-a verilən məlumata görə, bu gün İsmayıl Ömərova Akademiyanın diplomu Türkdilli Ölkələrin Siyasətinə Dəstək Fondunun (TÖSDF) prezidenti Nüstət Məmmədov tərəfindən təqdim olunub.

Nüsrət Məmmədov ə İctimai Televiziyanın türkdilli xalqların daha da yaxınlaşması üçün böyük işlər gördüyünü vurğulayıb və bildirib ki, televiziyanın “TRT-Avaz”la ortaq yayımına Qırğızıstan televiziyasının da qoşulması qırğız xalqı tərəfindən böyük sevinclə qarşılanıb: “Bütün bunları nəzərə alaraq Bişkekdəki Türkdilli Ölkələrin Siyasətinə Dəstək Fondunun təqdimatına əsasən və Beynəlxalq Aytmatov Akademiyası Elmi Şurasının qərarı ilə İctimai Teleradionun Baş direktoru İsmayıl Ömərov Beynəlxalq Aytmatov Akademiyasının üzvü seçilib. Bu elmin ən yüksək pilləsidir”.

Fəaliyyətinə verilən qiymətə görə təşəkkürünü bildirən İsmayıl Ömərov deyib ki, Çingiz Aytmatovun adı ilə bağlı olan bir mükafatın bioqrafiyasına daxil olması onun üçün böyük şərəf və məsuliyyətdir: “Hesab edirəm ki, bu ad türk dövlətlərinə xidmət nöqteyi-nəzərdən hər birimizin üzərinə daha böyük öhdəlik qoyur”. Baş direktorun sözlərinə görə, bu mükafat İctimai Teleradionun kollektivinə verilən qiymətdir.