Qarabağın tarixinə həsr olunmuş sənədli filmin təqdimatı keçirildi

Azərbaycan prezidenti yanında Strateji Araşdırmalar Mərkəzində (SAM) millət vəkili Həvva Məmmədovanın müəllifliyi ilə çəkilmiş “Dağlıq Qarabağ: Həqiqətlər, yalanlar...” adlı filmin təqdimat mərasimi keçirilib.

APA-nın məlumatına görə, SAM-ın direktoru Elxan Nuriyev bildirib ki, 35 dəqiqəlik sənədli filmdə ilk dəfə olaraq xarici ekspertlər (ABŞ, Rusiya, Türkiyə, Qazaxıstan) Dağlıq Qarabağ və Azərbaycanla bağlı öz fikirlərini səsləndirib: “Dünya ictimaiyyəti bilməlidir ki, erməni sindromu mövcuddur və ona qarşı ciddi mübarizə aparılmalıdır”.

H.Məmmədova isə filmin ingilis dilinə tərcümə olunduğunu və digər dillərə də tərcümə olunacağını deyib. Filmin məsləhətçisi, deputat Rəbiyyət Aslanova dünya ictimaiyyətinin, beynəlxalq təşkilatların Dağlıq Qarabağ münaqişəsinin həllində maraqlı olmadıqlarını söyləyib: “Onlar Dağlıq Qarabağla bağlı bugünkü status-kvonun dəyişdirilməsində maraqlı deyillər. Dünya sanki kordur, kardır”.
R.Aslanovanın fikrincə, 20 əsr insanı 21 əsr insanından daha xoşbəxt idi, çünki 20 əsr insanı münaqişələrin beynəlxalq təşkilatlar tərəfindən həll olunacağına inanırdı.

Millət vəkili Qənirə Paşayeva təklif edib ki, film Azərbaycanın xarici ölkələrdəki səfirlikləri vasitəsilə öncə Azərbaycan diasporuna çatdırılsın: “50 milyon azərbaycanlı bu filmi görməli, onu digər insanlar arasında yaymalıdır”.