“İslahat” seçki bloku elan olundu

Bu gün Bütöv Azərbaycan Xalq Cəbhəsi (BAXC), Böyük Quruluş və Ədalət partiyaları liderləri “İslahat” seçki blokunun yaradılması barədə niyyət protokolu imzalayıb. Lent.az-ın məlumatına görə, tədbirdə Böyük quruluş partiyasının sədri Fazil Qəzənfəroğlu bildirib ki, partiyalar seçki dairələrindən vahid namizədlə çıxış etməyi qarşılarına məqsəd qoyub.

Onun sözlərinə görə, artıq seçki dairələrinin 95 faizində namizədlər razılaşdırılıb. Yerdə qalan 5 faiz dairələrdə isə vahid namizədlərin müəyyən edilməsi istiqamətində müzakirələr aparılır. Fazil Qəzənfəroğlu deyib ki, həmin dairələrdə namizədləri müəyyən etmək mümkün olmasa, püşk atılacaq. O, həmçinin “İslahat” seçki blokunu “Müxalifətin məsuliyyətli seçki bloku” kimi dəyərləndirib.

BAXCP sədri Qüdrət Həsənquliyev isə deyib ki, bu seçkidə “qara piar”ın əleyhinə mübarizə aparacaqlar. Müxalifət partiyalarının onları “İqtidaryönlü” adlandırdığını deyən BAXC sədrinin sözlərinə görə, onlar həm də radikal müxalifətin bu tip kampaniyalarına qarşı mübarizə aparacaq.

Ramiz Mikayıloğlu