Xalq artisti Flora Kərimova əməliyyat olunub
28 iyul 2011 12:27 (UTC +04:00)

Xalq artisti Flora Kərimova əməliyyat olunub

Azərbaycan estradasının korifeylərindən biri, xalq artisti Flora Kərimova dünən “Medi lux” klinikasında gözündən cərrahiyyə əməliyyatı olunub.

Sənətçinin özünün Lent.az-a verdiyi məlumata görə, əməliyyat uğurlu keçib və hazırda o, özünü yaxşı hiss edir: “Gözümdə aparılmış uğursuz əməliyyata görə, mən yenidən əməliyyat olunmalıydım. Amma hər dəfə bir iş çıxırdı, əməliyyata getmirdim. Nəhayət gözlənilən əməliyyat dünən baş tutdu. Əməliyyat çox rahat və gözəl şəraitdə keçdi. Klinikaya atdığım ilk addımdan etibarən həm həkimlərdən, həm də xəstələrdən böyük qayğı gördüm. Klinikanın bütün heyətinin hörmət və qayğısı ilə əhatə olundum. Mən klinikanın baş həkiminə, əməliyyatımı edən Dilqəm həkimə dərin minnətdarlığımı bildirirəm. Və xüsusi qeyd etmək istəyirəm ki, əməliyyatım təmənnasız həyata keçirildi. Məndən bir qəpik də pul almadılar. Çox sevinirəm ki, millətimiz, xalqımız sənətkara hörmət hissini itirməyib”.

Flora Kərimova bildirib ki, klinikada ona özünə və qızına həsr olunmuş “Nigaranam” adlı kitab da hədiyyə olunub. Kitabın müəllifi Ceyhun Lətafətdir.

Sənətçi əməliyyat olunduğunu övladlarından və qohumlarından gizlətdiyini də deyib: “Düzdü, əməliyyatdan o qədər də qorxmurdum, amma bunu övladlarımdan və qohum-əqrəbamdan gizlətdim. Mətbuatdan oxuyandan sonra hamısının xəbəri olacaq. Yeri gəlmişkən, mən bütün mətbuat işçilərinə, məni yubileyim münasibətilə təbrik edən hər kəsə də öz təşəkkürümü bildirirəm”.

Hər iki gözünün alt və üst qapağında əməliyyat keçirin F. Kərimova onu da qeyd edib ki, şiş çəkilənə, gözləri təbii halını bərpa edənə qədər hələ bir müddət eynəklə gəzəcək: “Amma sonra eynəyimi çıxaracam. Çünki özüm də gözlərim üçün darıxmışam”.

Qeyd edək ki, bu, Flora Kərimovanın gözlərində aparılan sayca üçüncü əməliyyatdır.

Xəyalə Muradlı
# 1340

Oxşar yazılar