Azərbaycanda dövlət vəzifəsi tutan məmurlar arasında prezidentdən sonra ən yüksək maaşı baş nazir alır. Hazırda baş nazir Artur Rasizadənin aylıq rəsmi maaşı 1925 manatdır. Ən yüksək əməkhaqqına görə növbəti yeri 1700 manatla baş nazirin birinci müavini tutur.
Lent.az “İqtisadi forum” jurnalına istinadən bildirir ki, dövlət orqanlarının rəhbər işçilərinin vəzifə maaşlarının məbləği “Azərbaycan Respublikasının bəzi dövlət orqanlarının rəhbər işçilərinə yeni vəzifə maaşlarının müəyyən edilməsi haqqında” Azərbaycan Respublikası Prezidentinin 348 saylı, 10 avqust 2004-cü il tarixli sərəncamı ilə tənzimlənir. Sərəncama əsasən, Azərbaycan Respublikasının bəzi dövlət orqanlarının rəhbər işçilərinin aylıq vəzifə maaşları aşağıdakı məbləğdədir:
Tutduğu vəzifə | Əmək haqqının məbləği |
Baş nazir | 1925 manat |
Baş nazirin birinci müavini | 1700 manat |
Baş nazirin müavini | 1625 manat |
Nazirlər | 1500 manat |
Komitə sədrləri | 1500 manat |
Milli Bankın idarə heyətinin və Dövlət Sosial Müdafiə Fondunun sədri | 1500 manat |
Mərkəzi icra hakimiyyəti orqanlarına bərabər tutulan icra hakimiyyəti orqanının rəhbəri | 1250 manat |
Nazirin, Dövlət Komitəsi sədrinin, Milli Bankın idarə heyətinin və Dövlət Sosial Müdafiə Fondunun sədrinin birinci müavini | 1000 manat |
Nazirin, Dövlət Komitəsi sədrinin, Milli Bankın idarə heyətinin və Dövlət Sosial Müdafiə Fondunun sədrinin müavini, Mərkəzi İcra hakimiyyəti orqanlarına bərabər tutulan icra hakimiyyəti orqanının rəhbərinin birinci müavini | 875 manat |
Mərkəzi icra hakimiyyəti orqanlarına bərabər tutulan icra hakimiyyəti orqanının rəhbərinin müavini | 800 manat |
Şəhər və rayon icra hakimiyyəti başçılarının aylıq vəzifə maaşları
Bakı şəhəri - 1500 manat
Gəncə və Sumqayıt şəhərləri - 875 manat
Şəhərlər, rayonlar və şəhər tabeliyində olan rayonlar üzrə:
Əhalisi 50 min nəfərdən çox olan rayonlar - 750 manat
Əhalisi 50 min nəfərədək olan rayonlar - 600 manat
Bundan başqa rəhbər işçilərə səlahiyyətlərinin icrası ilə bağlı təmsilçilik xərclərinin ödənilməsi üçün vəzifə maaşlarının 25 faizi məbləğində aylıq əlavə pul təminatı verilir.
Beləliklə, Azərbaycanda baş nazirin illik maaşı 23100 manat, nazirlərin maaşları isə 18000 manatdır.
Elxan SALAHOV