Avropada “Real”, Azərbaycanda “Qarabağ”

Çempionlar Liqasının sabah start götürəcək təsnifat mərhələləri ərəfəsində turnirin ümumi cədvəli açıqlanıb. Apasport.az saytının məlumatına görə, UEFA-nın siyahısında 1955-ci ildən cari mövsümədək qitənin ən nüfuzlu klub turnirində yer alan komandalar qərarlaşıb.

Əvvəl Çempionlar kuboku, sonradan Çempionlar Liqası adlanan yarışın arxada qalan 63 mövsümündə 511 klub mübarizə aparıb. İştirakçılar arasında ən yaxşı nəticə “Real”a məxsusdu.

İspaniya təmsilçisi 48 mövsümdə 13 kubok qazanıb və keçirdiyi 423 matçda hesabına 254 qələbə, 74 heç-heçə və 95 məğlubiyyət yazıb. 942 qol vurub, 458-ni buraxan Madrid təmsilçisinin ən yaxın izləyiciləri “Bavariya” və “Barselona”dı.

Yarışın 511 iştirakçısından 7-si Azərbaycanı təmsil edir. Ən yaxşı nəticə Avropada 115-ci olan “Qarabağ”a məxsusdu. Ağdamlılar oyun, qələbə, heç-heçə, vurulan qol, top fərqi və xal sayında bütün komandalarımızı qabaqlayır. Qitənin 165-cisi olan “Neftçi” turnirdəki iştirak sayında Azərbaycan təmsilçiləri arasında liderdi. Digər klublarımız isə siyahının ikinci yarısında yer alıb.

yer	komanda	mövsüm	O	Q	H	M	T/F	X
115	Qarabağ	4	24	9	8	7	24-23	26
165	Neftçi	6	18	5	5	8	14-32	15
264	Bakı	2	6	2	2	2	7-8	6
290	İnter	2	6	1	3	2	3-5	5
384	Şəmkir	2	6	1	0	5	6-11	2
385	Kəpəz	2	4	1	0	3	4-9	2
411	Xəzər Lənkəran	1	2	0	1	1	2-4	1