Elektrik xətti qırılıb üstünə düşdü, sağ qaldı

Yüksək gərginlikli elektrik xəttinin qırılaraq, yerə düşməsi Lənkəran sakinin həyatını təhlükəyə atıb. Elektrik cərəyanın vurması nəticəsində bir saat ərzində yerdə qalan qadın huşunu itirsə də, sağ qalıb.

APA TV-nin xəbərinə görə, hadisə Lənkəran şəhəri Heydər Əliyev prospektində baş verib. Şəhər sakini, 59 yaşlı Məryəm Sadıxova ona məxsus mal-qaranı evə gətirməkdən ötrü örüşə çıxıb. Örüşdə qırılaraq yerə düşən yüksək gərginlikli elektrik xəttinin dalğası onu 15-20 m-dən özünə çəkərək yaxınlıqdakı su arxına tullayıb. Hadisə nəticəsində huşunu itirən 59 yaşlı qadın təqribən bir saata kimi suda qalıb. Məryəm Sadıxova ayılandan sonra sürünə-sürünə evə qayıdıb.

Qadının vəziyyəti ağır olduğundan qonşular dərhal Lənkəran Rayon Təcili və Təxirəsalınmaz Tibbi Yardım Stansiyasına müraciət ediblər. Stansiyanın həkim briqadası xəstəyə ilkin tibbi yardım göstərdikdən sonra şokdan ayılda bilib.

Xəstənin həyatı üçün təhlükə sovuşmayıb.