Ədliyyə orqanlarına qəbul imtahanı keçirildi

Ədliyyə orqanlarının layiqli gənc kadrlarla komplektləşdirilməsi məqsədilə mütəşəkkil qaydada davam etdirilən açıq müsabiqələr çərçivəsində noyabrın 16-da növbəti test imtahanı keçirilib. Ədliyyə Nazirliyinin mətbuat xidmətindən Lent.az-a verilən məlumata görə, imtahan Tələbə Qəbulu üzrə Dövlət Komissiyası (TQDK) ilə birgə şəffaflığın təmin edilməsi üçün vahid auditoriyada - Azərbaycan Texniki Universitetinin idman sarayında baş tutub.

İmtahanı yerli və beynəlxalq müşahidəçilər, eləcə də kütləvi informasiya vasitələrinin nümayəndələri izləyib, həmçinin, formalaşdırılmış təcrübəyə müvafiq olaraq tədbirin gedişi Nazirliyin internet səhifəsi (www.justice.gov.az) vasitəsilə “on-line” rejimində birbaşa yayımlanıb. İmtahanda namizədin hüquqi biliklərini, məntiqi nəticələr çıxarmaq qabiliyyətini və ümumi dünyagörüşünü müəyyən etmək üçün verilən test tapşırığı 100 sualdan ibarət olub. Yekun nəticələrə görə 147 namizəd müvəffəqiyyət qazanıb.

Namizədlərin imtahanlara mükəmməl hazırlaşmalarına və yüksək nəticələrə nail olmalarına köməklik məqsədilə Ədliyyə Akademiyasında xüsusi proqram əsasında hazırlıq kursu təşkil olunub, test imtahanı və söhbət mərhələsində sualların hazırlanmasında istifadə olunan normativ hüquqi aktlara dair xülasə, eləcə də namizədin "Yaddaş kitabçası" onlara çatdırılıb.

Test imtahanında müvəffəqiyyət qazanmış namizədlərin nəzərinə çatdırılır ki, onlar söhbət mərhələsində iştirak etmək üçün qanunvericilikdə nəzərdə tutulmuş sənədlərini 15 gün ərzində, saat 9-dan 18-dək Ədliyyə Nazirliyinin Kadrlar idarəsinə (Bakı şəhəri, İnşaatçılar prospekti 1) təqdim etməlidirlər. Sənədlərin siyahısı nazirliyin internet səhifəsində yerləşdirilib. Ədliyyə orqanlarına qulluğa qəbul üçün qanunvericiliklə müəyyən edilmiş tələblərə cavab verən namizədlər müsabiqənin ikinci mərhələsinə buraxılacaq və onlarla fərdi qaydada söhbət aparılacaq. Söhbətin vaxtı və yeri barədə namizədlərə əlavə məlumat veriləcək.

Qeyd edək ki, test imtahanının nəticələri haqqında Ədliyyə Nazirliyinin və TQDK-nın (www.tqdk.gov.az) internet saytlarından, eləcə də (012) 538-01-62, (012) 538-08-15 nömrəli telefonlar vasitəsilə ətraflı məlumat almaq olar.