Bir gecədə bir neçə oğurluq oldu

Samuxda bir gecədə bir neçə mağaza yarılıb.

APA TV-nin qərb bürosunun verdiyi məlumata görə, gecə saat 03 00 radələrində Samux rayonunda bir neçə mağazadan və internet klubdan pul, spirtli içkilər və siqaret oğurlanıb. Hadisə rayonun Karayeri qəsəbəsində, Nizami küçəsində qeydə alınıb. Belə ki, naməlum şəxs və ya şəxslər əvvəlcə qəsəbə sakinləri Tamella Quliyeva və Rəna Əliyevaya məxsus mağazadan oğurluq ediblər. Bundan sonra oğrular qonşuluqdakı digər işləməyən mağazanın və internet klubunun pəncərəsini sındırıblar.

Mağaza sahiblərinin bildirdiklərinə görə, oğrular mağazaya daxil olaraq ordan 5 min manat məbləğində araq, kontur, şərab, paltar, yataq dəstləri, uşaq pampersləri və müxtəlif markalı bahalı siqaret aparılıb. Bundan başqa oğrular mağazadan Tamella Quliyevaya məxsus 1 ədəd nootbuku da aparıblar.

Oğruların tapılaraq məsuliyyətə cəlb edilməsi istiqamətində Samux rayon Polis Şöbəsində əməliyyat axtarış tədbirlərinə başlanılıb. Araşdırmalar davam edir.