Bakıda və Sumqayıtda “on-line” qumarxanalar tapılıb

Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi əməkdaşlarının keçirdikləri əməliyyat tədbirləri nəticəsində Bakı şəhəri C.Naxçıvanski küçəsi, ev 49-da paytaxt sakini Aslan Hüseynzadənin “AZBET” adlı idman mərc və “on-line” sistemi ilə qumar oyunları təşkil etməsi müəyyən edilib. Lent.az-n nazirliyin mətbuat xidmətinə istinadən verdiyi məlumata görə, baxış zamanı oradan 1200 manat dəyərində 99 ədəd “AZBET” sözü yazılmış və müştərilər tərəfindən alınmış kupon qəbzlərinin kötükləri, 2 ədəd kompüter, 2 ədəd printer, 2 ədəd barkod qurğusu, müştərilərdən qanunsuz idman mərc qumar oyunlarının kuponları üçün alınmış pul və digər ləvazimatlar aşkar edilərək götürülüb.

Bundan başqa Baş Mütəşəkkil Cinayətkarlıqla Mübarizə İdarəsi əməkdaşlarının keçirdikləri əməliyyat tədbirləri nəticəsində Sumqayıt şəhəri 3-cü mikrorayon, ev 19 “B”-də şəhər sakini Səbuhi Nəsirovun “Mançester” adlı idman mərc və “on-line” sistemi ilə qumar oyunları təşkil etməsi müəyyən edilib. Baxış zamanı oradan 374 manat dəyərində 64 ədəd “Mançester” sözü yazılmış və müştərilər tərəfindən alınmış kupon qəbzlərinin kötükləri, 2 ədəd kompüter, 2 ədəd monitor, müştərilərdən qanunsuz idman mərc qumar oyunlarının kuponları üçün alınmış pul və digər ləvazimatlar aşkar edilərək götürülüb.