Ötən gün baş verən qəzaların AĞIR STATİSTİKASI - 6 ÖLÜ

Yanvarın 3-də Qubada ağır yol-nəqliyyat hadisəsi baş verib. Lent.az-ın Daxili İşlər Nazirliyinin saytına istinadən məlumatına görə, qəza ötən gün saat 17 radələrində baş verib. Belə ki, rayonunun Xanagah kəndi ərazisində Rustov kənd sakini Mehman Musayev idarə etdiyi "QAZel" markalı avtomobillə yolu keçən kənd sakinləri, azyaşlılar - Renat Qurbanovu və qardaşı Xəqanini vurub. Nəticədə R. Qurbanov hadisə yerində ölüb, Xəqaniyə xəstəxanada ilkin tibbi yardım göstərildikdən sonra o, buraxılıb.

Daha bir qəza Beyləqanda baş verib. Yanvarın 3-də saat 08 radələrində Beyləqan rayonunun Dünyamalılar kəndində rayon sakini Məhəmməd Məmmədov idarə etdiyi "VAZ-2106" markalı avtomobili qarşıda gedən həmyerlisi İlham Məmmədovun idarə etdiyi "Mercedes" markalı mikroavtobusa vurub. Nəticədə M. Məmmədov hadisə yerində ölüb.

Oxşar hadisə yanvarın 3-də saat 17 radələrində Sumqayıt da baş verib. Şəhərin H. Z. Tağıyev qəsəbəsinin ərazisində Xırdalan şəhər sakini Elmar Ələkbərov idarə etdiyi "Nissan" markalı avtomobili yolun kənarında dayanmış Şabran rayon sakini Eldar Səlimova məxsus "Mercedes" markalı avtomobilə vurub. Zərbənin təsirindən "Mercedes" markalı avtomobilin yaxınlığında olan 30-35 yaşlı kişi hadisə yerində ölüb, E. Səlimovun 3 sərnişini xəstəxanaya yerləşdirilib.

Yanvarın 3-də saat 08 radələrində Kürdəmir rayonunun Atakişili kəndi ərazisində Ucar rayon sakini Tural Süleymanov idarə etdiyi "QAZ-224721" markalı avtomobili qarşıda gedən Şəki rayon sakini Qalib Hüseynovun idarə etdiyi "Kamaz-5511" markalı avtomobilə vurub. Nəticədə T. Süleymanovun sərnişinlərindən həmyerlisi Şəhla Əzizova hadisə yerində ölüb, özü və digər sərnişini Validə Xəlilova xəstəxanaya yerləşdirilib. V. Xəlilova xəstəxanada keçinib.

Daha bir avtomobil qəzası da insan itkisi ilə nəticələnib. Yanvarın 3-də saat 12 radələrində Masallı rayonunun Ərkivan qəsəbəsində rayon sakinləri Mübariz Bağırovun idarə etdiyi "Seat" markalı və Rövşən Əmənovun idarə etdiyi "VAZ-2107" markalı avtomobillər toqquşub. Nəticədə R. Əmənov və sərnişinlərindən həmkəndlisi Təhminə Hacıyeva hadisə yerində ölüb, digər sərnişini və M. Bağırov isə xəstəxanaya yerləşdiriliblər.

Hər bir qəza ilə bağlı cinayət işi açılıb.