Ön cəbhədə yerləşən N saylı hərbi hissədə Azərbaycanın ən gənc Milli qəhrəmanı Cavanşir Rəhimovun həyatı, döyüş və qəhrəmanlıq yolundan bəhs edən “Cavanşir” filminin təqdimatı olub. Təqdimat Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitutu İB-nin təşkilatçılığı ilə baş tutub. Lent.az-ın məlumatına görə, Mədəniyyət və Turizm nazirliyinin dəstəyi ilə “Yaddaş” sənədli filmlər studiyasında çəkilən sənədli filmin rejissoru Kamalə Musazadədir.
Hərbi hissənin komandiri, polkovnik Mais Barxudarov qəhrəmanlarımız haqqında filmlərin hərbi hissələrdə təqdimatını yüksək qiymətləndirib.
Daha sonra filmin nümayişi olub. Filmlə bərabər C. Rəhimovla bağlı məlumatların əks olunduğu materiallar əsgərlərə paylanılıb və filmin nüsxələri yeni gələn əsgərlərə nümayiş olunmaq üçün hərbi hissəyə hədiyyə edilib.
Qeyd edək ki, Azərbaycanın ən gənc Milli Qəhrəmanı Cavanşir İzzət oğlu Rəhimov 5 İyun 1973-cı ildə Qax rayonunda anadan olub. Valideynləri ilə birlikdə Bakının Qaraçuxur qəsəbəsinə köçüblər. İlk təhsilini Qaraçuxurdakı 104 saylı orta məktəbdə alan C. Rəhimov idmanın bir neçə növü ilə məşğul olub. 1988-ci ildə milli azadlıq hərəkatına qoşulub. 1992-ci il mayın 26-da Cavanşir könüllü olaraq hərbi xidmətə gedib. Yüksək fiziki hazırlığına görə onu Zabrat Aviasiya müəssisəsinin ilk hərbi vertolyot eskadrilyasına qəbul ediblər. İyunun 12-də C. Rəhimov Qaladakı N saylı hərbi hissədən vertolyotdan bortatıcı kimi Qarabağ bölgəsinə yollanıb. Cavanşirin ilk döyüş yolu Ağcabədidən başlayıb. Ağdərə, Tərtər, Ağdam, Füzuli, Laçın, Qubadlı bölgələrindən yaralıların çıxarılmasında, meyitlərin daşınmasında fəal iştirak edərək, düşmənin hərbi texnikasını və canlı qüvvəsini məhv etməkdə böyük igidliklər göstərib. Avqustun 6 da Ağdərədə gedən ağır səma döyüşlərindən birində qəhrəmancasına şəhid olub. Bakıdakı Şəhidlər Xiyabanında dəfn edilib. 1992-ci ildə Azərbaycanın Milli Qəhrəmanı adı verilib.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
