İki nəfərin qatilinə 12 illik həbs cəzası verildi

Təqsirləndirilən şəxs arvadını və qayınatasını öldürüb

Sentyabrın 25-də Ağır Cinayətlərə Dair İşlər üzrə Məhkəmədə arvadını və qayınatasını öldürən şəxsə hökm oxunub.

Lent.az-ın məlumatına görə, hakim Ağababa Babayevin sədrliyi ilə keçirilən prosesdə Bakı şəhəri Binəqədi rayon sakini İmamverdi Xudaverdiyev Azərbaycan Respublikası Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) və 120.2.7-ci (iki və ya daha çox şəxsi öldürmə) maddələri ilə ittiham olunaraq 12 il müddətinə azadlıqdan məhrum edilib.

İttihama əsasən, İ.Xudaverdiyev 7 mart 2009-cu ildə qayınatası Aqil Məmmədovun yaşadığı ünvan gedərək ailə-məişət və qohumluq münasibətlərinin pozulması zəminində arvadı Gülnarə Xudaverdiyevanı və A. Məmmədovu küt alətlə başlarından vuraraq qətlə yetirib və hadisə yerindən qaçıb.

Fərid Əkbərov