Elçin Quliyev 2010-cu illə bağlı yekun hesabat təqdim etdi

Ötən il ərzində Azərbaycana qarşı kəşfiyyat-pozuculuq fəaliyyətinə görə cinayətkar dəstələr və şəxslər zərərsizləşdirilib

Dövlət Sərhəd Xidməti (DSX) tərəfindən 2010-cu il ərzində Azərbaycana qarşı kəşfiyyat-pozuculuq fəaliyyəti həyata keçirmək istəyən cinayətkar dəstələr və şəxslər zərərsizləşdirilib. APA-nın məlumatına görə, bu barədə DSX-nın 2010-cu ildə xidməti-döyüş fəaliyyətinin yekunlarına həsr olunmuş hesabat müşavirəsində xidmətin rəisi, general-leytenant Elçin Quliyev bildirib.

DSX rəisi deyib ki, aparılan tədbirlər nəticəsində xarici xüsusi xidmət orqanları ilə əlaqədə şübhəli bilinən 9 nəfər şəxs barədə müvafiq tədbirlər görülüb. Qanunsuz miqrasiya ilə məşğul olan 3 qrup, qaçaqmalçılıq, o cümlədən narkotik vasitətələrin qanunsuz dövriyyəsi ilə məşğul olan 5 mütəşəkkil cinayətkar dəstə zərərsizləşdirilib.

Bu ilin əvvəlindən indiyədək sərhəd naryadlarına qarşı 9 halda sərhəd pozucuları tərəfindən silahlı müqavimət göstərilib. Dövlət sərhədinin mühafizəsi zamanı sərhəd naryadları tərəfindən təlimatlara uyğun olaraq sərhəd pozucularına qarşı silah tətbiq edilərkən 3 silahlı sərhəd pozucusu zərərsizləşdirilib.