Vaşinqtonda Azərbaycan günləri keçiriləcək

Nizami Gəncəvi Beynəlxalq Mərkəzi ilə olan əməkdaşlıq proqramı çərçivəsində ABŞ-ın Smithsonian İnstitutunun Asiya Mədəniyyəti Proqramı və Asiya, Avropa və Yaxın Şərq Etnologiyası bölməsinin direktoru, professor Paul Taylor Azərbaycanda səfərdədir.

Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, səfərin əsas məqsədi Mərkəzlə Smithsonian İnstitutu arasında birgə reallaşdırılacaq layihələr və 2014-cü ildə ABŞ-da keçirilməsi nəzərdə tutulan Azərbaycan mədəniyyəti günlərinə hazırlıqların görülməsidir.

Bununla əlaqədar bir sıra dövlət qurumlarında keçirdiyi görüşlərdə Paul Teylor Azərbaycan mədəniyyəti və tarixinin təbliğ olunması məqsədi ilə birgə nəşrlərin hazırlanması və Smitshonian İnstitutunda müxtəlif sərgi, mühazirələrin, təqdimatların keçirilməsi və Nizami Gəncəvi Beynəlxalq Mərkəzinin Vaşinqtonda nümayəndəliyinin açılması məsələlərini də müzakirə edir.

Qeyd edək ki, bu layihələr Diasporla İş üzrə Dövlət Komitəsinin dəstəyi ilə reallaşdırılır.