Şamilin kəndi mühasirədə: ölən və yaralananlar var

Dünəndən başlayaraq Dağıstanın Qimri kəndində federal qüvvələrlə yaraqlılar arasında döyüş gedir. Lent.az-ın Dağıstan KİV-ə istinadən verdiyi məlumata görə, kənddə yaraqlıların gizləndiyi barədə xəbər tutan federallar Qimrini mühasirəyə alıblar. Nəticədə döyüş başlayıb. Gecə yaraqlılardan bir neçəsi mühasirəni yara biliblər. Amma həm yaraqlılar, həm də federal qüvvələr arasında itkilər var.

Gələn xəbərlərə görə, Qimri kəndi bu dəqiqələrdə mühasirədədir. Amma onlara qarşı təkcə yaraqlılar yox, kənd əhalisi də müqavimət göstərir. Federal qüvvələr əhali ilə qarşıdurmaya getməyərək hələ ki kəndi sadəcə mühasirədə saxlayırlar, Qimriyə daxil olmurlar.

Dağıstan KİV-nin yazdığına görə, kənd camaatı Qimridə gizləndiyi ehtimal olunan bir neçə yaraqlını federal qüvvələrə vermək istəmirlər.

Xatırladaq ki, 19-cu əsrdə Dağıstanda çar Rusiyasına qarşı azadlıq mücadiləsi aparmış Şeyx Şamil bu kəndə anadan olub. Gimri Dağıstandakı yaraqlılar üçün müqəddəs kənd hesab edilir.