Qətərin yeni əmiri: «Atamın siyasətini davam etdirəcəyəm»

Qətərin yeni əmiri Tamim bin Həmad əl-Tani millətinə ilk müraciətində atasının yürütdüyü siyasətə sadiq qalacağını bildirib.

Lent.az-ın xarici informasiya vasitələrinə istinadən məlumatına görə, o, deyib ki, bu siyasət ölkəsini körfəzin ən varlı dövlətlərindən və Yaxın Şərqin aparıcı oyunçularından biri edib.

Qətərin yeni lideri daxildəki problemlərdən danışsa da, xarici siyasətdə üstünlük verəcəyi məsələlərə toxunmayıb.

61 yaşlı Həmad bin Xəlifə əl-Tani iyunun 25-də könüllü olaraq, 33 yaşlı oğlunun xeyrinə hakimiyyətdən getdiyini bildirib. Bu bölgə dövlətlərində görünməmiş hadisə sayılır.

Son illər Qətər beynəlxalq aləmdə öz mövqeyini gücləndirib.

2022-ci ildə isə neftlə zəngin bu ölkədə futbol üzrə dünya çempionatı keçiriləcək.

Onu da qeyd edək ki iyunun 26-da Qətərdə yeni hökumətin tərkibi elan olunub.

Əmir Tamim bin Həmad əl-Taninin fərmanına əsasən, şeyx Abdulla bin Nasir əl -Tani ölkənin baş naziri təyin olunub.

Xarici işlər naziri vəzifəsinə isə Xalid bin Məhəmməd əl -Atiyə gətirilib.