Putin ABŞ-ın keçmiş kəşfiyyatçısını vermək istəmir

Rusiya prezidenti Vladimir Putin ABŞ Mərkəzi Kəşfiyyat İdarəsinin (MKİ) keçmiş əməkdaşı Edvard Snoudenin Moskvaya gəldiyini təsdiqləyib.

Lent.az-ın «BBC»-yə istinadən məlumatına görə, Amerika hakimiyyəti tərəfindən ittiham olunan keçmiş MKİ-çi barədə o, bunları söyləyib: «O, tranizit sərnişini kimi gəlib. Ona nə viza, nə də başqa sənədlər lazımdır. Bu statusu ilə o, bilet alıb, istədiyi yerə uça bilər. O, dövlət sərhədini keçmədiyi üçün ona viza da lazım deyil».

Bununla belə Rusiya prezidenti qeyd edib ki, ölkəsinin xüsusi xidmət orqanları onunla işləməyib və işləmir.

Rusiya hakimiyyətinin ünvanına deyilən ittihamlar informatorun Moskvaya gəlməsi ilə bağlıdır. Putin bunu «cəfəngiyyat və boşboğazlıq» adlandırıb.

«Ümid edirəm ki, bu məsələ ABŞ-la işgüzar xarakterli münasibətlərimizdə öz əksin göstərməyəcək və əks tərəf bunu anlayacaq. Cənab Snouden sərbəst adamdır və gedəcəyi son nöqtənə nə qədər tez getsə bir o qədər yaxşı olar»-deyə, Rusiya prezidenti vurğulayıb.