Milli azlıqların işi üzrə baş komissar Gürcüstandadır

ATƏT-in milli azlıqların işi üzrə baş komissarı Knut Vollebek Gürcüstanda səfərdədir. APA-nın Gürcüstan bürosunun məlumatına görə, baş komissar iyunun 20-də işğal olunan torpaqların sərhəd xəttinə səfər edəcək. Bu barədə Gürcüstan daxili işlər nazirliyin mətbuat xidmətindən APA-ya məlumat verilib.

Məlumata görə, iyunun 19-da Knut Vollebek Gürcüstanın baş naziri Bidzina İvanişvili, xarici işlər naziri Maya Pancikidze və daxili işlər naziri İrakli Qaribaşvili ilə görüşüb ATƏT-in milli azlıqların işi üzrə baş komissarına Gürcüstandakı münaqişə zonalarındakı vəziyyət barədə, qaçqınların və məcburi köçkünlərin vəziyyəti barədə ətraflı məlumat verilib. Baş komissar milli azlıqların hüquqlarının müdafiəsi ilə də maraqlanıb. B.İvanişvili ilə görüşdə Cənubi Osetiya inzibati sərhəd boyu tikanlı məftillərin çəkilməsi məsələsi də müzakirə olunub. Baş nazir münaqişə zonasında ATƏT xətti ilə monitorinq aparılmasının vacibliyini vurğulayıb.

Məlumata görə, bu səfər ATƏT-in milli azlıqların işi üzrə baş komissarın Gürcüstana son səfəridir.