Marneuli rayonuna yeni icra başçısı təyin olunub

Azərbaycanlıların kompakt yaşadığı Marneuli rayonunda yeni təyinat həyata keçirilib. APA-nın Gürcüstan bürosunun məlumatına görə, Merab Topçişvili Marneuli rayonunun icra hakimiyyəti başçısı vəzifəsinə təyin olunub. O, 1963-cü il martın 17-də Mtsxeta rayonunun Diğomi kəndində anadan olub, 1981-1986-cı illərdə Gürcüstan Politexnik İnstitutunu (mühəndis-metallurq ixtisası üzrə), 1989-1991-ci illərdə Dövlət Təhlükəsizlik Komitəsinin Tbilisi ali kurslarını bitirib. 1980-1981-ci illərdə Gürcüstan Politexnik İnstitutunda laborant, 1986-1989-cu illərdə Rustavi şəhərindəki “Sakqipromez” Layihə İnstitutunda mühəndis, baş mühəndis, layihənin baş mühəndisinin müavini vəzifələrində işləyib.

1991-2010-cu illərdə Gürcüstan Təhlükəsizlik və Daxili İşlər Nazirliyi orqanlarında müxtəlif vəzifələrdə çalışıb. 2010-cu ildən ehtiyatda olan zabitdir. 2013-cü ilin sentyabr ayınadək “Qlobalfarm” MMC-də təhlükəsizlik meneceri vəzifəsini icra edib. Bu ilin sentyabrın 7-də Marneuli rayonunun icra başçısı hakimiyyəti vəzifəsinə təyin olunub.