“Türkiyə serialları ailə ənənələrini aşındırır”
İranda son illər rekord həddə çatan boşanmaların səbəbi müəyyənləşdirilib.
Lent.az-ın Türkiyənin NTV telekanalına istinadən verdiyi məlumata görə, İran boşanmaların səviyyəsinə görə dünyada dördüncü ölkədir, Tehranda isə təkcə bu il ərzində boşanmaların sayı 6 faiz artıb.
Bu boşanmaların əsas səbəblərindən biri Avropa Birliyi və ABŞ-ın İrana qarşı tətbiq etdiyi iqtisadi sanksiyalar, işsizliyin səviyyəsinin artmasıdır. İqtisadi səbəbi qəbul edən İran hökuməti hesab edir ki, boşanmaların artmasına yol açan ikinci əsas səbəb Türkiyə seriallarıdır. İran hökuməti hesab edir ki, seriallar ailə ənənələrini aşındırar. Əhməd Mahmud adlı İran rəsmisi deyib ki, statistik hesablamalar İranda insanların 4 saat serial izlədiklərini, ərlə arvad arasında söhbətin isə 14 dəqiqəyə endiyini göstərir. İranda günorta saatlarında Qərb mədəniyyətinin təsirinə qarşı mübarizə aparmaq məqsədi ilə yayınlanan bir proqramda kişilər arvadlarını öldürməyə, ya da boşanmağa səbəb olaraq peyk telekanallarını göstərirlər.