Bu gün Həsən Ruhaninin prezidentliyi təsdiqlənəcək

Bu gün İranın ali dini lideri Seyid Əli Xamneyi cari ilin iyun ayında ölkədə keçirilən prezident seçkilərində qalib gəlmiş Həsən Ruhanini prezident vəzifəsinə təyin olunmasını təsdiqləyəcək.

APA-nın “Press TV” kanalına istinadən verdiyi məlumata görə, Tehranda yerli vaxtla saat 17:00-da başlayacaq mərasimdə H.Ruhani İran prezidenti vəzifəsində Mahmud Əhmədinejadı əvəz edəcək. Bundan sonra o artıq rəsmi olaraq ölkəni dörd il ərzində idarə etməyə başlayacaq.

Avqustun 4-də isə Həsən Ruhani İran parlamenti qarşısında and içəcək. Mərasimdə 11 ölkənin prezidentləri, onlarla parlament sədrləri, xarici işlər nazirləri və vitse-prezidentləri iştirak edəcək. Azərbaycandan mərasimdə Milli Məclis sədri Oqtay Əsədov iştirak edəcək.

Qeyd edək ki, iyunun 14-də keçirilən seçkilərdə H.Ruhani 50.71 faiz yığaraq prezident seçilib.